無用石評 周俊輝個展: Interview the Interviewer【一人一點藝評社 One Point Critique Society】
藝術新聞
周俊輝同 SC Gallery Sharon 合作，喺個展「Interview the Interviewer」玩身份調換，由周俊輝擔當 Sharon 以前嘅角色－記者，透過訪問返 Sharon 前記者嘅身份，用畫作上「報導」多次 Sharon 嘅記憶。作品講咗好多繪畫同新聞，喺構思同製作影像上嘅異同，創作過程亦引伸咗好多關於視覺互換、增減信息同游走紅線嘅思考。但更令我感興趣嘅係 Sharon 宜家同時係藝廊創辦人（策劃）、畫中主角同記者，喺整個策劃入面嘅角色非常複雜，亦令呢批畫作，作為歷史載體嘅意義變得有趣。
SC Gallery 向來支持本地藝術家，從佢地過往所展出嘅作品同藝術家，唔難發現 Sharon 作為前記者，想記錄本地人與事嘅心。但藝術品唔同新聞，新聞可以存檔，而藝廊入面嘅藝術品，最理想當然係搵到住好收藏家。唔排除收藏品他日會被藝術館收藏，或者比學術機構拎嚟研究，但比起新聞存檔，進入藝術市場／生態嘅藝術品嘅命運更難預測，所接觸到嘅受眾亦好唔一樣。歷史同感受乘坐於藝術品之上，無人知佢地最後會到達一個點樣嘅地方，抑或係石沉大海。Sharon 亦一如既往，重操故業，以新聞角度報導展覽，上載去佢嘅 Youtube 頻道，令整個展覽再次成為新聞存檔，Sharon 嘅新聞存檔，再次擺呢一抽歷史去另一個載體。
當然，無人會要求畫廊「包生仔」，將呢批作品護送到藝術館，用新聞嘅標準留底，送到每個喺未來嘅香港人。各地一直有同類型嘅策劃發生，歷史事件喺今次策劃入面，經過紀錄、剪接、報導、覆述、篩選、創作、再被記錄。而立於現在，喺作品面前嘅我不禁想像作品同當中信息嘅去向。被畫框斬開咗嘅《國家元首 I》同《國家元首 II》會唔會分別比人收藏喺兩個更遠嘅地方呢？他日再展示《記協第41屆晚宴》、《記協第37屆晚宴》嘅時候，又會有點樣嘅觀眾代替畫中「被缺席」嘅記者慶祝呢？
《算尻數啦你》用廣東話幫江澤民講出（可能係佢嘅）心底話，呢句話同時講比𠴱時嘅 Sharon 聽、現在嘅 Sharon 聽、藝術家、以前同現在嘅香港人聽，當然亦係講比在場睇住幅畫嘅你聽。
圖片由作者拍攝。
-
「周俊輝個展: Interview the Interviewer」
展覽日期：27/9 - 11/11/2023
展覽地點：SC Gallery 黃竹坑道53號 英基工業中心1902
Facebook專頁：SC Gallery
Instagram專頁：@sc_gallery_sharon
