top of page
其他新聞

無用石 評 無以名狀 VOL. III 歐律伙刻的謐息【一人一點藝評社 One Point Critique Society】


謐靜的冥湖


版畫技法襯上希臘神話,劉杭霖嘅作品總比人一種典雅同神聖嘅感覺。由草莓蛋糕開始,佢一直嘗試用靜物畫去刻畫代表愛、欲望同真理嘅物件。今次 Avery 借用 Orpheus 去冥界試圖救返愛妻 Eurydice 嘅故事,創作佢心入面嘅多條冥河,亦透過 Eurydice 思考地獄、思考愛。


我著迷於 Avery 作品嘅最主要原因,係因為佢堆疊出嘅黑色真係非常吸引。黑色抹去背景同時,又能夠形成一個唔大但寬敞嘅空間,實淨而帶空間感。黑色亦冇比機會時間留低任何痕跡,營造永恆嘅感覺,承載神話同人生永問嘅問題。Orpherus 應該都同多數人一樣,會覺得冥界就係個清算罪過,忘記前世,等待輪迴嘅痛苦火海。亦因為愛, Orpherus 想帶 Eurydice 返回人間。但 Avery 就想像 Eurydice 其實一啲都唔覺得冥界可怕,佢將冥界五湖想像成許願池,抽空背景,聚焦五湖所代表嘅憤怒 Styx 、怨恨 Acheron 、遺忘 Lethe 、 火 Phelgethon 同悲傷 Cocytus 。所有物件喺靜物畫中,雖然係客觀地存在,但對 Eurydice 黎講,呢一切都係愛存在嘅證據。


有啲物件好似蠟燭、蛋糕同食具等,一直有喺 Avery 嘅創作中出現。嚟到 VOL. III ,Avery 交出更細膩畫功,佢地嘅輪廓亦都變得更仔細。今次仲重畫左 Lethe ,同並行嘅記憶之河 Mnemosyne,相比之前嘅版本,兩者都同其他河一樣,根據其神話而被想像成有碑、圓形、更大嘅許願池。許願池之所以誘人,係因為池水好似會永遠流動咁,永恆而真實,畫入面嘅水同影都精細咁刻劃出呢一切。幾個冥湖入面,我對 Phlegethon 同 Cocytus 特別有感:Phelgethon 被設計成蛋糕嘅樣貌,湖中嘅火同水都可以好清晰咁從佢地嘅動態而區分,蠟燭上有 Avery 一向拿手嘅細膩火光,同時誘人而危險;Cocytus 就用紅色色塊覆蓋黑色池底同池邊,相比有顆粒嘅池邊,透視嘅紅色血池睇落更加平靜同冷血。


唯一美中不足嘅係場地有限,如果係放喺 white cube ,一個更整齊同潔癖嘅空間,成件事應該會更有神聖感。


圖片由作者拍攝。

-

「無以名狀 Vol. III — 歐律狄刻的謐息」

展覽日期:7/11 - 2/12

展覽地點:Touch Gallery, Shop 103 and 202, Block 3 Barrack Block, Tai Kwun

Facebook專頁:Touch Gallery

Instagram專頁:touch_galleryhk






Tags:

Comments


Recent News
bottom of page