無用石 評 黃慧心個展「下垂眼皮的陰影裏有些田」【一人一點藝評社 One Point Critique Society】
下垂眼皮前有些田顯影了
喺暗暗地嘅空間入面，大量影像支配空間同視覺。由有幾分熟悉嘅香港野豬，到陌生嘅山路，走到最入，你會搵到幾隻山羊喺山上遊走。山上面嘅景色，既可以因為地景同天氣唔同而話佢地有分別；又可以因為佢地都有差不多嘅石屎路、工程等人造物而話冇分別。山徑係通往自然嘅人工物，現代人進入自然嘅必經之路。對於自然中嘅人工物，我地見怪不怪，但喺山林中見到人工物突兀嘅形狀同物料，內心難免會有一絲嘅不安。
Winsome 嘅藝術處理係同時隨意但又經過思考，我認為 @ar.twister 喺《來一場城市中的偵探遊戲》一文中對 Winsome 嘅描述非常準確，係「破碎、拼湊」嘅味道，係「接近人們日常無意識的觀看」。 Winsome 展出相片嘅方式非常隨性：以顏色紙或者燈光配上高對比度嘅相片，加上唔對稱嘅剪裁，同用書釘、鏍絲同紗做嘅裝裱，唔介意留低「唔精準」嘅地方，令作品呈現粗䊯暴亂嘅感覺，就好似喺山林中見到嘅人造物一樣。 Winsome 亦會不時隨心改變或者增加呈現方式，展覽好似處於會生長嘅「有機」狀態，但諷刺地，呢種「有機」同時係人為嘅。另一方面，喺各地山徑拍低嘅流動影像非常搖晃，睇得出 Winsome 只係用簡單嘅設備拍攝，同普通人無啦啦打開電話錄影嘅狀態一樣。呢啲流動影像被精心編排到多個大螢幕上，佢地好成功咁形成一個沉浸亦都漸進嘅山林經驗，但 LED 光源同時提示住觀眾，呢個只係人工再現嘅山林。
展覽中嘅所有影像處理都流露人工物同自然之間嘅矛盾， Winsome 精心思考素材，包括影像、載體、裝裱材料，然後去到現場先「有機地」重新創作同決定燈光，靠嘅係喺日常同創作嘅時候，同樣保持對周遭高度敏感。而 Winsome 嘅感受力同創作力，都已經同影像工具同物料分唔開。同攝影或錄像唔同，我會形容 Winsome 嘅創作係屬於純影像，藝術家就係感知影像/世界嘅主體，佢「列印」出嚟嘅影像成果就好似相機自帶濾鏡咁，油然而生。
圖片由作者拍攝。
-
黃慧心個展 「下垂眼皮的陰影裏有些田」
展覽日期：7/12/23 - 7/1/24
展覽地點：張靜蘭實驗畫廊 香港藝術中心三樓
Facebook專頁：Hong Kong Arts Centre 香港藝術中心
Instagram專頁：hongkongartscentre
Comments