top of page
其他新聞

【一人一點藝評社 One Point Critique Society】無用石 評次元文明考古計劃:超時空神殿



古代能量發現


陶啟安嘅「次元文明考古計劃」一直遊走日本動漫元素同古代文明,配以似石頭、含金屬嘅釉彩將玩具轉化成「化石」,將二次元文化中所相信嘅價值,放入人類生存同成長嘅故事入面思考。計劃所引用嘅動漫作品大部分都以科幻冒險為主軸,主角會一步步咁,透過收集不同物件同力量而成長或進化。喺上年嘅 Art Basel 中, Benny 已經嘗試加入角色扮演遊戲 (RPG) 元素,用動漫作品同樣慣用嘅方式,讓觀眾都進入到呢個冒險世界。今次喺 vA! ,藝術家進一步利用場地特性,透過電子遊戲將 vA! 轉化成一座幾層高嘅迷宮,要觀眾喺入面進行各種任務同探索。


Benny 過往嘅陶瓷作品多數都用玩具倒模創作,最近嘅作品愈做愈大件,今次亦都展出左唔少大型同耗時嘅作品,體積同數量上都增加緊呢個次文化古文明存在嘅證據。但比起陶瓷,我更想講下今次使用電子媒介嘅方式:遊戲有互動元素可以提供於實體外嘅觀賞資訊,同埋遊戲故事能夠引導觀眾遊走展覽呢啲不在話下,實在非常基本。我認為今次用電子遊戲做主軸用得聰明,其一在於二次元世界本來就存在於電子媒介,而當中所引用過嘅動漫作品中,佢地嘅主人翁亦係透過科技設備而得到古代力量,進入冒險,要觀眾進入營幕同手機入面感受故事係非常合理。其二係因為 vA! 並唔係一個整齊嘅白盒子 (White Cube),特別喺展區旁邊仲有好多其他空間同設施,唔同人出出入入,當觀眾專注喺電子遊戲入面嘅時候,好自然會無視展區以外嘅嘢,喺雜亂嘅空間入面依然有乾淨嘅觀賞經驗。


無論係內容定實際考量上,今次展覽都有充分理由以電子遊戲方式呈現。亦係其中一個有力例子,證明要連結藝術同電子世界,係唔一定要用「可能性」或者「賽博」之名做包裝。科技自古就存在,就藝術而言,重點一直在於我地有幾了解佢地,能夠釋放出幾多佢地嘅能量。


圖片由作者拍攝。

@barren.rock.artchive

-

次元文明考古計劃:超時空神殿

展覽日期:22/11/23 - 26/2/24

展覽地點:香港視覺藝術中心一樓至三樓

Facebook專頁:香港視覺藝術中心 Hong Kong Visual Arts Centre

Instagram專頁:hongkongvisualartscentre





Tags:

Recent News
bottom of page